13 PROPOSAMEN HAUTATU DIRA, ETA IRAILAREN 10ETIK 30ERA BITARTEAN, HERRITARREK  300.000 EURO ZERTARAKO ERABILI ERABAKI AHAL IZANGO DUTE BEREN BOTOEKIN. 

Arrigorriagako bigarren aurrekontu parte-hartzaileen hirugarren fasean gaude. Herritarrek 174  proposamen egin zituzten hasierako etapan. Ondoren, udal-teknikariek, gobernu-taldekideekin  batera, bideragarritasun-azterketa eta azken behaketa egin zituzten, eta hainbat neurri hautatu  zituzten. Orain, herritarren txanda da berriro, botoak emateko unea. 

Esan bezala, gobernu-taldeak eta bulego teknikoak elkarrekin egindako lanari esker, bozketa fasera igaroko diren herritarren proposamenak aukeratu ahal izan dituzte. Oreka bilatu nahi izan  dute balio erantsiko irizpideetatik abiatuta, hala nola lehentasuna, eraginkortasuna, ahalik eta  herritar gehienei mesede egitea, etab. Herriguneari eta Abusuri buruzko proposamenak sartzen  saiatu dira. Guztira, 13 neurri dira. 

Proposamenak baztertzeko arrazoiei dagokienez, hiru izan dira nagusiki: alde batetik,  aurreikusita zituzten edo plangintzan jasota zeuden proposamenak baztertu dituzte; bestetik,  ekonomikoki bideragarriak ez ziren proposamenak ere alde batera utzi dituzte; eta, azkenik,  ikuspuntu teknikotik bideragarriak ez ziren proposamenak ere baztertu dituzte. 

Orain herritarrek 300.000 euroko partida zertarako erabili zuzenean erabaki behar dute.  Irailaren 10etik 30era bitartean, Arrigorriagan erroldatuta dauden 16urtetik gorakoek botoa  emateko aukera izango dute. Hiru multzo aurkituko dituzte: 0 eta 50.000 euro bitarteko bost  proposameneko zerrenda bat, 50.000 eta 100.000 euro bitarteko bost proposameneko beste  bat, eta 100.000 eta 150.000 euro bitarteko hiru proposameneko azken zerrenda bat.  Lehenengo zerrendan gehienez bi proposamen aukeratu ahal izango dituzte parte-hartzaileek,  eta, azken bietan, berriz, aukera bakarra; guztira, lau proposamen. Garrantzitsua da  jakinaraztea bakoitzak behin bakarrik eman dezakeela botoa.

Lehenengo fasean bezala, botoa emateko hainbat bide izango dituzte: batetik, inprimakia betez  eta hainbat udal-eraikinetan jarriko diren hautestontzietan zuzenean utziz (inprimakia etxe  guztietara helduko da eta udal-eraikinetan ere egongo da), edo, bestela, prozesurako sortu den  web atariaren bidez: https://erabaki.arrigorriaga.eus. 

Fase hau amaitu ondoren, zenbaketa egingo da eta urrian zehar Arrigorriagako Udalaren  2025eko aurrekontuan sartuko diren herritarren proposamenak jakinaraziko dira. 

Maite Ibarra alkateak adierazi duenez, “Arrigorriagan horrelako ariketa kolektiboa egiten den  bigarren aldia da, eta emaitza ikaragarria izaten ari da. Lehenengo fasean 174 proposamen jaso  genituen, eta parte-hartze altu hori oso garrantzitsua da guretzat. Gure politika egiteko modua  herritarrekin batera ulertzen dugu; elkarrekin gure herriari dagozkionak erabakitzeko. Horregatik, orain arte egin bezala, prozesuan jarraitzera animatzen ditugu herritarrak. Guretzat  plazer handia da zuekin, Arrigorriagako herritarrekin, bidea egiten jarraitzea”. 

Prozesu hau gobernu-taldeak Arrigorriagako gobernu planean jasotako konpromisoen artean  dago; zehazki, 95. neurriari dagokio: agintaldian zehar parte-hartze izaerako aurrekontu prozesuak gauzatzea.